અમેરીકા પ્રવાસ (૨૦૧૪) - ભાગ ૧

(આ શ્રેણીના બીજા લેખો માટે અહી ક્લિક કરો)

મોટા દિકરાને ઘરે દિકરી આવી. દીકરીનો જન્મ 2014માં ગણેશ ચતુર્થીનાં દિવસે અમેરીકાનાં ન્યૂયોર્ક શહેરમાં થયો.

મોટા દીકરાનો જન્મ અમરેલીમાં થયેલો. તે વખતે હું બાબરામાં શિક્ષક હતો અને સૌરાષ્ટ્રની એક વખતની પ્રસિદ્ધ શૈક્ષણિક સંસ્થા શારદાગ્રામમાં શિક્ષકોનાં એક સેમિનારમાં હતો. નાના દીકરાનાં જન્મ વખતે અમરેલી જિલ્લાના બાબાપુર અધ્યાપન મંદિરમાં એક નિરીક્ષક તરીકે નિરીક્ષણ કરી રહ્યો હતો! બન્ને પ્રસંગોએ ગેરહાજર. પરંતુ પૌત્રીનાં જન્મ સમયે તેનાં પિતા પણ હાજર અને ભાવનગરથી છેક ન્યૂયોર્ક પહોચેલી તેની દાદીમા પણ હાજર. હા, પણ આ દાદો તો ભાવનગર ફાર્મ હાઉસમાં જ.

અમેરિકાની હોસ્પિટલની સેવા ખૂબ વખણાય છે. તેની સ્વચ્છતા પણ ઉડીને આંખે વળગે તેવી હોય છે. પૌત્રીની ડીલીવરી બાબતે અમે બધાં નિશ્ચિંત હતાં. છતાં દેવી ન્યૂયોર્ક પહોંચી, દાદીમાની મીઠી ભૂમિકા અદા કરવાં. દાદી જેવું પૌત્રીને વ્હાલ કોણ કરે? સાસુ વિના પુત્રવધુને ગિર ગાયનાં ઘીમાંથી બનાવેલું કચરયું કોણ ખવરાવે?

હું નિવૃત્તિ પછી પણ બાળકેળવણીની વાત કરવાં સમગ્ર ગુજરાતમાં ભમતો હોઉં છું. આ વાતમાં સયુંકત કુટુંબની બાળક ઉપર કેવી હકારાત્મક અસર થાય છે તે પણ અચૂક કહું. એક વાત તો ભારપૂર્વક કહું જ કે, દરેક બાળકને દાદા દાદીનો પ્રેમ મળવો જ જોઈએ.

પૌત્રીનો જન્મ એક સામાન્ય ડીલીવરીથી થયો. તમને જાણીને આશ્ચર્ય થશે કે અમેરિકામાં સામાન્ય ડીલીવરી અત્યંત સહજ અને સામાન્ય છે! ત્યાં સિઝેરિયન અસામાન્ય છે! ત્યાંની હોસ્પિટલ, ત્યાંની માવજત, ત્યાંના ડોક્ટર સહીત સમગ્ર સ્ટાફ દ્વારા દાખવવામાં આવતાં વિનયવિવેક કેવાં હોય તે અંગેની વાત દેવી પાસેથી જાણી ત્યારે લાગે છે કે આપણા દેશમાં દર્દીઓની માવજત અને તથા તેના સગાવહાલાઓ સાથે કરવામાં આવતાં વર્તન બાબતે હજુ કેટલોયે પંથ કાપવાનો બાકી છે.

અમેરિકામાં બાળકનાં જન્મ પૂર્વે માતાપિતાને બાળસંભાળની તાલીમ આપવામાં આવે છે. હોસ્પિટલ ખુદ આ ફરજ અદા કર છે. બાળકનાં જન્મ પૂર્વે, જન્મ સમયે અને જન્મ બાદ માતાપિતાએ કેવી કેવી કાળજી લેવાની થાય છે તેનું દાદુ  શિક્ષણ આપવામાં આવે છે. આ તાલીમનાં કારણે દિકરો અને પુત્રવધૂ ખૂબ જ સ્વસ્થ હતાં. તેથી અમે પણ લગભગ લગભગ નિશ્ચિંત હતાં.

માતાપિતાએ પૌત્રીનું નામ પાડ્યું ‘તાશી’. તાશીનો અર્થ થાય છે “શુભ” અથવા “શુકનિયાળ કન્યા”. દિકરો તથા પુત્રવધૂ દીકરીનું નામ ચિત્ર વિચિત્ર કે અંગ્રેજી રાખવાનાં મોહમાં ના પડ્યા તે ગમ્યું.

તાશી હજુ તો માત્ર બે માસની જ હતી ત્યાં જ અમેરિકાથી ભાવનગર આવેલી. પુત્રવધૂ શીતલ ઘણી બાહોંશ અને હિંમતવાન, તેથી મા દિકરી 15,000 કિમીની લાંબી હવાઈ મુસાફરી કરી અમારી સાથે બેક મહિના રહી ગયેલાં.

પછી દીકરા અને પુત્રવધૂના પ્રેમને કારણે દાદા-દાદી પૌત્રી તાશીને રમાડવા અમેરિકા ગયા.

આ વખતનો અમેરિકા પ્રવાસ ત્રીજી વખતનો હતો. જતાં પહેલાં દિકરા સાથે એક શરત કરેલી કે અમેરિકા આવીએ પણ આ વખતે આપણે ઘરની બહાર ક્યાંય જશું નહી. આમેય તમે અમને ભરપેટે અમેરિકા બતાવ્યું છે, હેલીકોપ્ટરમાં પણ બેસાડી પ્રવાસ કરાવ્યો છે. હવે વધારે જોવાની કોઈ તાલાવેલી નથી. આ વખતે તો બસ તાશી અને માત્ર તાશી.

તાશીના જન્મ સમયે દિકરો હડસન નદીના કાંઠે વસેલા જગવિખ્યાત ન્યૂયોર્ક સિટીના મેનહટન વિસ્તારમાં રહેતો. માતબર અને પ્રસિદ્ધ વિસ્તાર. પરંતુ હવે પુત્રીને વધુ સુવિધા મળે તે માટે હડસન નદીનાં સામા કાંઠે વસેલા જર્સી સિટી નામનાં ખૂબ સુરત સહેરમાં ઘર બદલાવ્યું છે. અહીં ગ્રાઉન્ડ ફ્લોરવાળું અત્યંત સુવિધાવાવાળું સુંદર ઘર મળી ગયું છે. સંપૂર્ણ ઘર સફેદ રંગથી રંગાયેલું છે. ખૂબ શાંતિ મળે તેવું અને નયનરમ્ય ઘર છે.

દિકરો અને પુત્રવધૂ જાણતાં હતાં કે બાળક ઉપર ઘર, ઘરની આસપાસનાં પડોશીઓ, આસપાસનાં માનવીઓ, આસપાસનો વિસ્તાર અને તેના પર્યાવરણની ઘેરી અસર થતી હોય છે. આ કારણે તેઓએ ઘર બદલાવવાનો જે નિર્ણય લીધો તે ખુબ ગમેલો.

વિશ્વ પ્રવાસી દીકરા ગૌરવે અને પુત્રવધુ શીતલે દૂર સુધી ફરવાં નહિ જવાનું વચન પાળ્યું. અમે ઘરમાં જ પૌત્રીની સાથે મજાનો સમય પસાર કરતાં.